जङ्गली जनावरले मकै बाली सखाप पारेपछि किसान चिन्तित

दाङमा जङ्गली बँदेलले मकै बालीमा क्षति गर्न थालेपछि स्थानीयवासी चिन्तित भएका छन् । बाँके राष्ट्रिय निकुञ्जको मध्यवर्ती क्षेत्र र आसपासका जङ्गली बँदेल र बाँदरले अन्नबाली सखाप पार्न थालेपछि स्थानीयवासी चिन्तित भएका छन् ।
दाङसँग सिमाना जोडिएको बाँके राष्ट्रिय निकुञ्जको मध्यवर्ती क्षेत्रमा पर्ने बबई गाउँपालिका ७ मलईमा पनि जङ्गली बँदेल र बाँदरले बर्सेनि अन्नबाली नष्ट गर्दै आएको स्थानीयवासीको गुनासो छ । राष्ट्रिय निकुञ्ज भएपछि जङ्गलमा जनावर बढ्दै गएको र गाउँमा आएर अन्नबाली क्षति गर्ने गरेको स्थानीय प्रेम पुनको भनाइ छ । उनका अनुसार गाउँमा झन्डै तीन सय घर रहेको र बारीमा लगाएको अन्नबाली जङ्गली जनावरले नष्ट गरिदिने गरेका छन् । किसानले पटक पटक भोग्दै आएको समस्याका लागि पटक–पटक निकुञ्ज र पालिकालाई खबर गरे पनि समाधान गर्न कसैले पहल नगरेको किसानको गुनासो छ ।
शान्तिनगर गाउँपालिका २ सिमसुन्दुरपुर र विष्णुपुरका किसानले लगाएको मकैबाली दर्जनौँको सङ्ख्यामा आउने जङ्गली बँदेलले नष्ट गरेका छन् । पश्चिम दाङका बबई, शान्तिनगर, दङ्गीशरणका केही वडामा जङ्गली बँदेलले अन्नबाली नष्ट गर्दै आएका छन् ।