पुनःनिर्माण सुस्त

प्रतिनिधिसभा अन्तर्गतको अन्तराष्ट्रिय सम्बन्ध समितिले पुरातात्विक सम्पदामा देखिएका समस्या अध्ययन गर्न विश्वसम्पदामा सूचीकृत सांस्कृतिक क्षेत्र अध्ययन तथा अनुगमन उपसमिति गठन गरेको छ ।  सिंहदरबारमा मंगलबार बसेको समिति बैठकले सांसद सुजिता शाक्यको संयोजकत्वमा पाँच सदस्यीय उपसमिति गठन गरेको हो । बैठकमा विश्व सम्पदा सूचीमा सूचीकृत सम्पदा हनुमानढोका क्षेत्रमा देखिएका समस्या सम्बन्धमा छलफल भएको थियो । उपसमितिलाई काठमाडौँ उपत्यकाका सबै सम्पदा क्षेत्रमा देखिएका समस्याका बारेमा अध्ययन गरी प्रतिवेदन तयार गर्न तीन महीनाको अवधि निर्धारण गरिएको छ ।   

पुरातात्विक  सम्पदा क्षेत्रको पुनःनिर्माणका क्रममा देखिएका समस्याका बारेमा उठेका विषयवस्तु गम्भीर भएकाले थप अध्ययन गर्न उपसमिति गठन गरिएको समितिले जनाएको छ । बैठकमा सांसदहरुले पुरात्वात्वीक सम्पदाको संरक्षणका लागी सरकोकारवाला निकाय निकै सुस्त देखिएको धारणा राखेका थिए । सांसद माधवकुमार नेपालले नेपालले कानून मिचेर सम्पदा क्षेत्रलाई असर पार्ने गरी कम्प्लेक्स निर्माण गरेको भए डोजर लगाएर भत्काउनुपर्ने बताउनुभयो । साथै उहाँले नियम कानूनभन्दा माथि कोही नहुने भन्दै सम्पदाको पुनःनिर्माण गर्दा मौलिक शैलीमा जस्ताको त्यस्तै बनाउनु्पर्ने धारणा व्यक्त गर्नुभयो । बैठकमा पुरातत्व विभागका कामु महानिर्देशक दामोदर गौतमले भूकम्पले क्षतिग्रस्त पुरातात्विक सम्पदाको पुनःनिर्माणको अवस्थाबारे जानकारी गराउँदै हालसम्म २८ प्रतिशत कार्य सम्पन्न भएको जानकारी गराउनुभएको थियो । यस वर्ष ३० प्रतिशत पुनःनिर्माण सम्पन्न हुने र बाँकी आगामी दुई वर्षमा सकिने उहाँले जानकारी दिनुभयो ।