खोटाङका १० स्थानीय तहमा विभिन्न प्रकारका कृषि कार्यक्रमका लागि क्षेत्र निर्धारण

खोटाङका १० स्थानीय तहमा विभिन्न प्रकारका कृषि बालीको पकेट क्षेत्र तथा ब्लक विकास कार्यक्रमका लागि क्षेत्र निर्धारण गरिएको छ । प्रधानमन्त्री कृषि आधुनिकीकरण परियोजना अन्तर्गत जिल्लास्थित दुई नगरपालिका र आठ गाउँपालिकामा अलैंची, सुन्तला, कफी र कागती, आलु लगायतका कृषि बालीका २३ पकेट क्षेत्र र आठ वटा ब्लक विस्तार गर्ने गरी क्षेत्र निर्धारण गरिएको हो । जिल्ला समन्वय समितिका प्रमुख बबी चाम्लिङ संयोजकत्वको अनुदानग्राही छनोट समितिको बुधबार बसेको बैठकले करिब दुई हजार रोपनी क्षेत्र ओगट्ने ब्लकको क्षेत्र निर्धारण गरेको हो । कृषि व्यवसायको प्रवद्र्धनका लागि नगदे बालीको ब्लकको विकास गर्नका लागि प्रदेश सरकारले प्रतिब्लक ३५ लाख रकम उपलव्ध गराएको कृषि ज्ञान केन्द्रका अधिकृत हरिनारायण राईले जानकारी दिनुभयो । यस्तै जिल्लाको हलेसी तुवाचुङमा लिची र कागती, दिक्तेल रुपाकोट मझुवागढी नगरपालिकामा सुन्तला र तरकारी, ऐसेलुखर्कमा अलैंची र आलु, रावाबेंसीमा लिची र किबी, जन्तेढुंगा गाउँपालिकामा आलु र तरकारीको दुई–दुईवटा पकेट क्षेत्र बनाउन पनि क्षेत्र निर्धारण गरिएको छ । पकेट क्षेत्र विस्तारका लागि परियोजना अन्तर्गत प्रतिपकेट क्षेत्र आठ लाख बजेट प्राप्त भएको छ । यसै आर्थिक वर्ष मकै उत्पादकत्व प्रवद्र्धन, मध्यपहाडी प्रांगारिक कृषि प्रवद्र्धन अभियान, कागती खेती मिसन कार्यक्रम तथा व्यवसायीक फलफुल तथा बगैंचा स्थापना सहयोग कार्यक्रम सञ्चालन गरिने भएको छ । यस्तै राजमार्ग लक्षित तरकारी उत्पादन, अलैंची निजी नर्सरी स्थापना, सार्वजनिक जग्गामा फलफुल खेती प्रवद्र्धन, बीउविजन आत्मनिर्भर कार्यक्रमसहित चैते धान विशेष सहयोग कार्यक्रम सञ्चालन गरिने कृषि ज्ञान केन्द्रले जनाएको छ ।।