कुषिको कारण समुद्धि

कुनै समय एक हजार रुपैयासम्म जुटाउन नसक्ने अवस्थाका प्रेमराज भट्ट छोटो समयमै कृषि फर्ममा अब्बल किसानको पहिचान बनाउँन सफल हुनुभएको छ । कक्षा ९ पछी थप अध्ययनका लागि गाउँबाट कैलाली झरेका किसान भट्टले एक हजार रुपैयाको च्याउ खेतीबाट शुरु गरेको ७ वर्षमै करोडौ आम्दानी गर्न थाल्नु भएको छ । घरको पछाडी सानो छाप्रो बनाएर २०६८ सालमा च्याउ खेती शुरु गर्नुभएको युवा व्यवसायी भट्टले अहिले कैलालीको चुरे गाउँपालिका–३, खानीडाँडामा २० टनेल र गोदावरी नगरपालिका–२, तेघरीमा ६ टनेलमा च्याउ खेती गरिरहनुभएको छ । भट्टले च्याउ खेतीबाट मात्र बार्षिक १० लाख बढी आम्दानी गरिरहनुभएको बताउनुभयो । २०७१ सालमा एक बिघा क्षेत्रफलबाट शुरु गरिएको कुरिलो खेती अहिले ७ बिघामा फैलिएको छ । भट्टले अहिले कैलालीको गोदावरी नगरपालिका–२, तेघरीमा एक बिघा र लालपुरमा ६ बिघामा कुरिलो खेती पनि गरिरहनुभएको छ । के.पी.कृषि फर्म दर्ता गरेर च्याउ तथा कुरिलो खेती, कुखुरापालन, बंगुरपालन गरिरहनुभएका भट्टले सबै व्यवसायमा सफल भएका छन् । २०७० सालमा घरको पछाडी सानो खोर बनाएर पाँच सय कुखुरा पालनबाट व्यवसाय शुरु गर्नुभएको भट्टले अहिले आठ हजार कुखुरा पालन गरिरहनुभएको छ । उहाले गोदावरी नगरपालिका–२, तेघरी, सोही नगरपालिका–५, लालपुर र अत्तरिया बजारमा जग्गा लिजमा लिएर कुखुरापालन गरिरहनुभएको छ । उहाले प्रत्यक्ष रुपमा ११ जना र अप्रत्यक्ष एक सय बढीलाई रोजगारी समेत दिनुभएको छ । किसान २०७२ सालमा उक्त नगरपालिका–२ तेघरीमा २० वटा बंगुरबाट शुरु गरेको बंगुरपालन व्यवसाय अहिले बढेर ५० बढी पुगेको जानकारी दिनुभएको छ । कृषि पेशालाई आँगालेदेखि नै जीवन परिवर्तन भएको उहाको भनाई छ । कृषि कर्मसँगै कुखुरापालक, बंगुरपालक तथा च्याउ तथा कुरिलो खेती गर्न चाहने किसानका लागि समय समयमा तालिम समेत दिने गर्नुभएको छ । यता प्रधानमन्त्री कृषि आधुनिकरण परियोजनाबाट च्याउ खेतीका लागि तीन लाख रुपैयाबाट कुनै सहयोग नपाएको भन्दै वास्तविक किसानलाई सरकाले नहेर्ने दुःखेसो गर्नुभयो । पहुँचका आधारमा कृषिको अनुदान दिईने परम्पराले आफूजस्ता वास्तविक किसान मारमा परेको भट्टको गुनासो छ । सफलताको बाटो सहज त छैन, एक कृषकले कर्मशिल भई काममा लागेमा सफलता त्यति टाढा पनि छैन । कुनै पनि व्यवसाय गर्दा चुनौति र असहजता आउन सक्छ तर कामप्रति दृढ भएर लागेमा जस्तोसुकै चुनौतिको सामना गर्दै सफलताको शिखर चुम्न पनि त्यति गाहो देखिएको छैन ।।