व्यावसायिक ओखरखेती गर्दै रुकुमका स्थानीय, डेढ करोडमा ४० हजार बिरुवा खरिद

नगर क्षेत्रलाई ओखर सुपरजोनका रूपमा विकास गर्ने भन्दै रुकुम पश्चिमको आठबिसकोट नगरपालिकाले डेढ करोड रुपैयाँमा ४० हजार बिरुवा खरिद गरेको छ । कम उत्पादन हुने र बाँझो रहेको जमिनमध्ये करिब ५० हजार रोपनीमा ओखर खेती गरी ओखर जोनका रूपमा विकास गर्ने योजना नगरपालिकाले बनाएको छ । नगर प्रमुख गोर्खबहादुर केसीका अनुसार २ हजार मिटरभन्दा माथिका अधिकांश ठाउँमा ओखर बगैँचा निर्माण गरिने भएको छ । पर्याप्त ओखर उत्पादन गरी जिल्लाबाहिर निर्यात गर्ने र नगरवासीको आयस्रोतमा वृद्धि गर्न टर्कीबाट ४० हजार बिरुवा खरिदसमेत गरिसकेका छन । ५० हजार रोपनीमा ५ लाख बिरुवा लगाइने नगरको योजना छ । सोही अभियानले उक्त नगर ओखरको सुपरजोन बन्ने नगर प्रमुख केसीले जानकारी दिनुभयो । त्यसका लागि ४ करोड रुपैयाँ लाग्ने अनुमान गरेको छ । अहिले टर्कीबाट उन्नत जातका दाँते ओखरका ४० हजार बिरुवा डेढ करोड रुपैयाँमा खरिद गरिएको नगर प्रमुख केसीले बताउनुभयो । नगरपालिकाको कार्यालयसम्म पुर्याउन प्रतिबिरुवा ३ सय ७० रुपैयाँ पर्न गएको छ । ४० हजारमध्ये आधा बिरुवा आइसकेको र आधा आउने क्रममा रहेको बताइएको छ ।।