ओखलढुंगामा तरकारी बजार बन्द

कोरोनाको संक्रमण रोकथामका लागि नेपाल सरकारले देश लकडाउन गरेपछि पनि चार सातासम्म लाग्दै आएको ओखलढुंगाको तरकारी बजार बन्द गरिएको छ । बजारमा तरकारी किनमेलका लागि आउने व्यक्तिहरुको भिडलाई व्यवस्थापन गर्न नसक्दा हटियाँ बन्द गर्ने निर्णय गरिएको हो ।

सदरमुकाममा सातामा दुई दिन बुधबार र शनिबार लाग्दै आएको नियमित हाटबजार मानिसको धेरै भिड भएको र त्यसले कोरोनाको जोखिम बढाउने भन्दै शनिबारबाट पूर्णरुपमा तरकारी बजार बन्द गरिएको हो । कोरोनाको संक्रमण सुरु भएसँगै तरकारीबाहेक कपडा, खाद्यान्न लगायत अन्य सामानको हाटबजारमा बिक्री वितरणमा रोक लगाईएको थियो । अहिले तरकारी बजार व्यवस्थापनमा समेत चुनौती आएकाले बन्द गरिएको सिद्धिचरण नगरपालिकाका प्रमुख मोहनकुमार श्रेष्ठले बताउनुभयो । तरकारी तथा खाद्यान्नको कारोबारमा पनि सयौंको संख्यामा मानिसहरुको भिड लाग्न थालेपछि कोरोनाको त्रास नघटेसम्म बजार बन्द गरेको नगरप्रमुख श्रेष्ठले जानकारी दिनुभयो । नगरपालिकाको निर्णयपछि हाटबजार क्षेत्रमा तरकारी राखेर बेच्न नपाईने भएको छ । सातामा दुई दिन लाग्ने हाटमा स्थानीय किसानहरुले उत्पादन गरेका तरकारी बिक्रीका लागि राख्ने गरेका थिए । तरकारी बिक्री गर्ने र किन्ने मानिसहरुका लागि स्थानको रेखाङ्कन गरिएको भएपनि नियम पालना नहुँदा जोखिम बढेको छ ।