कृषिजन्य उद्योग स्थापना गर्ने सरकारको योजना

कृषि उत्पादन तथा बजारीकरणका लागि सरकारले कृषिजन्य उद्योग स्थापना गर्ने भएको छ । आउँदो आर्थिक वर्षमा कृषिजन्य उद्योगमा विशेष प्राथमिकता दिने गरी बजेट विनियोजन गर्ने सरकारको तयारी छ ।

कृषि उत्पादन, बजारीकरण र प्रशोधन क्षेत्रमा प्रयाप्त बजेट विनियोजन गर्ने र अन्तर मन्त्रालय समन्वय गरी कृषिजन्य उद्योग सञ्चालन गर्ने सरकारले योजना बनाएको छ । वैदेशिक रोजगारीबाट फर्केका युवालाई कृषि र उद्यमसँग जोडेर आकर्षक प्याकेज ल्याउने सरकारले योजना अघि सारेको छ । उद्योग, वाणिज्य तथा आपूर्ति मन्त्रालय र कृषि तथा पशुपन्छी विकास मन्त्रालयले कृषि उत्पादन र कृषिजन्य उद्योगमा उच्च प्राथमिकता दिने योजना अघि सारेका छन् । कृषिमन्त्री घनश्याम भुसालले दुई वर्षभित्र कृषिमा आत्मनिर्भर हुने योजना अघि सारेको कृषि मन्त्रालयले जनाएको छ । तर कृषिसहित स्वदेशमै उत्पादन हुनसक्ने अधिकांश क्षेत्रमा उत्पादन नहुँदा दुई खर्ब भन्दा बढीको कृषि उपज आयात भइरहेको छ ।