तरकारी र फलफूल ढुवानीका गाडी दार्चुला प्रवेशमा रोक

दार्चुला जिल्लामा बाहिरी जिल्लाबाट आयात हुने तरकारी र फलफूल ढुवानीका गाडी प्रवेशमा रोक लगाइएको छ । महाकाली नगरपालिका–६ का एक युवक बिहीबार कोरोना संक्रमित भेटिएपछि सतर्कताको लागि तरकारी र फलफूल ढुवानी गर्ने सवारी साधनको प्रवेशलाई पूर्णरुपमा रोक लगाइएको हो ।

संक्रमित भेटिएपछि जिल्ला संकट व्यवस्थापन केन्द्रको बैठकले बाहिरी जिल्लाबाट तरकारी र फलफूल ढुवानी गर्ने सवारी साधनको आवागमन पूर्णरुपमा निषेध गर्ने निर्णय गरिएको प्रमुख जिल्ला अधिकारी यदुनाथ पौडेलले जानकारी दिनुभयो । जिल्ला सदरमुकाम स्थित सार्वजनिक स्थल, अव्यवस्थित रुपमा सञ्चालित पसलहरु हटाउने तथा महाकाली नगरपालिकाको बजार क्षेत्रका अत्यावश्यक सेवा बाहेकका गतिविधिलाई पूर्ण नियन्त्रणमा राख्ने निर्णय गरिएको बताइएको छ । यस्तै बैठकले बजार क्षेत्रमा हुने अनावश्यक भिडभाडलाई नियन्त्रण गर्न सुरक्षाकर्मी परिचालन गर्ने निर्णय गरेको छ । जिल्ला प्रशासन कार्यालयबाट जारी आदेशको उल्लंघन गरिएको पाइएमा संक्रमित रोग ऐन २०२० अनुसार कारबाही गर्ने निर्णयसमेत गरेको छ ।