उखु किसानको भुक्त्तानी तत्काल देऊ

राष्ट्रिय मानवअधिकार आयोगले उखु किसानहरूले पाउनुपर्ने रकम तत्कालै भुक्तानी गर्न सरकारलाई आग्रह गरेको छ । किसानहरूको रकम सरकारबाट भुक्तानी गरी उखु खरिदकर्ताबाट सो रकम उठाउन आयोगले सरकारलाई अनुरोध गरेको हो । आयोगले किसानको रकम भुक्तानी नगर्ने व्यवसायीलाई तत्काल कारबाही गर्न पनि सरकारको ध्यानाकर्षण गराएको छ । ‘किसानका हक अधिकारका सम्बन्धमा व्यवस्था गरिएका कानुनको प्रभावकारी कार्यान्वयन गर्न, उखु किसानका समस्याहरुको समाधानमा संवेदनशील हुन, किसानको श्रमको सम्मान गर्न, विगतमा भएका सम्झौताको कार्यान्वयन गरी किसानहरुको मौलिक हक र मानव अधिकार समेतको संरक्षण गर्न आयोग नेपाल सरकार र चिनी उत्पादक कम्पनीहरूको ध्यानाकर्षण गराउँदछ,’ सोमबार आयोगले जारी गरेको विज्ञप्तिमा भनिएको छ । चिनी उत्पादक कम्पनीहरूबाट विगतदेखि नै उखुको भुक्तानी नपाएको, सरकारले निर्धारण गरेको मूल्यभन्दा कम मूल्यमा उखु खरिद गरेको र उखु किसानहरुले नेपाल सरकारसँग विगतमा गरेको सम्झौता अझै कार्यान्वयन नभएको भन्दै गत मङ्सिर २७ गतेदेखि सर्लाही, रौतहट, नवलपरासी, कपिलवस्तु लगायतका उखु किसानहरूले काठमाडौंमा प्रदर्शन गरिरहेका छन् ।।