दैनिक उपभोग्य वस्तु ३ महिनाका लागि मौज्दात छः वाणिज्य विभाग

वाणिज्य, आपूर्ति तथा उपभोक्ता संरक्षण विभागले दैनिक उपभोग्य वस्तु ३ महिनाका लागि मौज्दात रहेको बताएको छ । चामल, दाल, नुन, तेल, चिनी लगायतका दैनिक उपभोग्य वस्तुहरु पूर्णरुपमा लकडाउन भएको अवस्थामा पनि ३ महिनालाई पुग्नेगरी बजारमा मौज्दात रहेको बताएको हो । विभागले उपभोग्य खाद्यवस्तुको आपूर्ति सहज रुपमा भइरहेको जनाउँदै उपभोक्तालाई आवश्यकता भन्दा बढी खरिद गरी सञ्चय नगर्न पनि आग्रह गरेको छ । साथै, दैनिक उपभोग्य वस्तुको आयातमा कुनैपनि प्रकारको समस्या नभएको पनि बताएको छ । महामारीको समयमा उपभोग्य वस्तुको अस्वभाविक मूल्यबृद्धि गराउनेलाई कारबाही गरिने पनि जनाएको छ । निषेधाज्ञामा पनि बजारको अवस्थाको बारेमा दैनिक रुपमा अनुगमन गरेको विभागको दाबी छ ।