अत्याधिक भिड बढेपछि कालिमाटी तरकारी बजारमा खुद्रा कारोबार बन्द

कोरोना जोखिम बढेको भन्दै कालिमाटी फलफूल तथा तरकारी बजारमा खुद्रा कारोबार बन्द गरीएको छ । अत्याधिक भिड बढेका कारण मंगलबार जिल्ला प्रशासन कार्यालय काठमाडौंको अनुगमन पछि फलफूल तथा तरकारीको खुद्र्रामा हुने कारोबार निषेधाज्ञा अवधिभर बन्द गर्ने निर्णय भएको बजार विकास समितिले जनाएको छ । खुद्रामा तरकारी किन्न आउने बहानामा सडकमा मानिसहरुको आवागमन बढेको र बजारमा पनि भिड भएको निष्कर्षपछि खुद्रा कारोबार बन्द गर्ने निर्णय भएको हो । होलसेल बजारमाबाट तरकारीको खुद्रा कारोबार पनि गर्न नपाइने बताइएको छ । बजारमा रहेका स्टलबाट थोक तरकारी तथा फलफूलको कारोबार भने नियमित सञ्चालनमा रहने छ । देशका बिभिन्न ठाउँका किसानले बारीमा रहेको तरकारी सिधै बिक्री गर्न पाउनेगरी बजारभित्रको ‘अक्सन यार्ड’ भने खुला राखेको समितिले जनाएको छ ।