बेलबारी नगरपालीकाले अष्ट्रेलियाबाट ल्याएको भनिएको बोयर जातको बाख्रा नेपालमै किनेको भेटियो

बेलबारी नगरपालिकाले गत शनिवार अर्थात जेठ १५ गते किसानलाई वितरण गरेको बोयर जातका बाख्राका पाठा पाठी अष्ट्रेलियाबाट ल्याइएको दावी ‘गलत’ सावित भएको छ । वितरित बाख्राहरु सम्झौता अनुसारका ‘शतप्रतिशत शुद्ध अष्ट्रेलियन बोयर जातका’ भनेर नगरापलिकाले बताए पनि पुष्टि गरेको छैन । किसानलाई वितरण गरेलगत्तै वितरित बोका पाठीहरु भनिए अनुसारका शुद्ध प्रजातिको नभएको र अष्ट्रेलियाबाट ल्याइएको समेत हैन भनी आलोचना भएको थियो । आलोचना भएको ३ दिन वितिसक्दा पनि नगरपालिकाले यसबारे पुष्टि गर्न सकेको छैन् । गत शनिबार नगरपालिकाले अष्ट्रेलियाबाट ल्याएको भन्दै किसानलाई ५२ ओटा पाठा र ३८ वटा पाठी वितरण गरेको थियो ।
एकातर्फ नगरपालिकाले पुष्टि गर्न नसक्नु र अर्कोतर्फ पशु सेवा विभाग अन्र्तगतको आयात निर्यात नियमन शाखाले अष्ट्रेलियाबाट बोकापाठी नभित्रिएको दाबी गर्नुले नगरपालिकाले गलत प्रचार गरेको पुष्टि भैसकेको छ । नगरपालिकाले किसानहरुका लागि उन्नत जातका ‘फुल ब्लड अष्ट्रेलियन’ बोयर बोकाबाख्रा ल्याउन ग्रो अर्गानिक कृषि प्रा.लि.सँग सम्झौता गरेको थियो । सम्झौता अनुसार नै तोकिए बमोजिमका बोकाबाख्रा अष्ट्रेलियाबाट लाइएको प्रचार गरिएपनि अहिलेसम्म अष्ट्रेलियाबाट बोकापाठी नभित्रिएको पशुसेवा विभाग अन्तर्गतको आयात निर्यात नियमन शाखाले जनाएको छ । प्रजाति विस्तार ब्रिडिङका लागि ल्याइने बोकाबाख्रा आयात गर्नुअघि त्यस विषयमा पशुसेवा विभागमा अनिवार्य जानकारी तथा सम्पुर्ण विवरण नै अग्रिम उपलब्ध हुनुपर्छ । तर, विभागमा सो विवरण उपलब्ध नरहेको शाखाका डेस्क अफिसर डाक्टर मनोज शाहीले बताएका छन् । त्रिभुवन विमानस्थलबाट आउने होस वा छिमेकी भारत वा चिनसँगको जमिनको नाकाबाट ल्याइने सम्पुर्ण पशुका बारेमा विभागमा अनिवार्य जानकारी हुनु पर्छ । तर, त्यसरी अष्ट्रेलियाबाट वा भारत चिनबाटै पनि बोकाबाख्रा आयात नभएको दाबी शाहीको छ । नेपालमा कोभिड सुरु भएयता विगत झण्डै १ वर्ष देखिनै अष्ट्रेलियाबाट बोकाबाख्रा नभित्रिएको शाहीको दाबी छ । यसरी ल्याइने बोकाबाख्राका विषयमा जन्मको मात्रै नभएर उनीहरुका तिन पुस्ते जानकारी सहितको विवरण नै अग्रिम उपलब्ध हुनुपर्ने प्रावधान छ । यता, पशुसेवा विभागका क्वारेन्टाइन अफिसर डाक्टर मोदनाथ गौतमले पनि ब्रिडिङका लागि ल्याइने बोकाबाख्राका विषयमा क्वारेन्टाइनका लागि वा आयात अनुमतिका लागि समेत अनिवार्य विभागमा जानकारी गराउनै पर्ने व्यवस्था रहेको बताउँछन् ।
तर, बेलबारी नगरपालिकाले अष्ट्रेलियाबाटै ल्याएको भनिएको ती बोकाबाख्राको प्रजातिय शुद्धता र आयातका विषयमा चौतर्फी प्रश्न उठ्दा समेत नगरपालिकाले जवाफ दिन सकेको छैन् । सोमबारमात्रै विज्ञप्ती जारी गर्दै बेलबारी नगरपालिकाले सम्झौता बमोजिमको बोकाबाख्रा पुष्टि नभएमा र मापदण्ड पुरा भएको नदेखिएमा ग्रो अर्गानिक प्रा.लि.को धरौटी जफत गरी कालोसुचीमा राखेर कानुनी प्रकृया अघि बढाउने जनाएको छ । नगरपालिकाले कम्पानीलाई भुक्तानी दिएको छैन । २ दिनभित्रमा बोकाबाख्राका सम्पुर्ण जानकारी विवरण र आयात सम्बन्धीका सबै डकुमेन्ट नगरपालिकामा बुझाउने प्रतिवद्धता कम्पनीले गरेकाले सम्झौता विपरितका काम भएको भए भुक्तानी नहुने नगरपालिकाले जनाएको छ । किसानहरुले समेत बोकाबाख्राहरु शुद्ध अष्ट्रेलियन नभएको दावी गरेका छन् ।