६ महिनामा ९० करोडको केरा आयात

नेपालले चालु आर्थिक वर्षको ६ महिनामा ९० करोड रुपैयाँको केरा आयात गरेको छ । भन्सार विभागले सार्वजनिक गरेको तथ्यांक अनुसार नेपालले ९० करोड ५२ लाख रुपैयाँ मूल्यको ३० हजार ९ सय २३ टन केरा आयात गरेको हो । भन्सार विभागको तथ्यांक अनुसार साउनदेखि पुससम्म कुल ९ खर्ब ९९ अर्ब ३४ करोड रुपैयाँ बराबरको वस्तु आयात भएको छ । यो गत आव को ६ महिनाको तुलनामा ५१.१३ प्रतिशत धेरै हो । आयातसँगै निर्यातमा पनि वृद्धि भएको छ । तर, निर्यातको तुलनामा आयातको अनुपात उच्च हुँदा व्यापार घाटा पनि बढ्दै गएको छ । भन्सार विभागका अनुसार चालु आवको पहिलो ६ महिनामा नेपालको कुल वस्तु निर्यात १ खर्ब १८ अर्ब ८५ करोड पुगेको छ । ६ महिनामा चामल मात्रै २७ अर्बभन्दा माथिको आयात भएको छ । केरा आयातबाट सरकारले ८ करोड १७ लाख ५१ हजार रुपैयाँ राजस्व उठाएको छ ।