पर्साका किसानले कब्जामा लिए ६ ट्रक रासायनिक मल

काठमाडौं । पर्साका किसानले कृषि सामग्री कम्पनी लिमिटेडको गोदामबाटै मल कब्जामा लिएका छन् । उनीहरुले ६ ट्रक रासायनिक मल कब्जामा लिएका हुन् । वीरगञ्ज महानगरपालिकाका मेयर राजेशमान सिंहलाई साथ लिएर उनीहरुले मल कब्जा गरेका हुन् । मेयरलाई साथमा लिएर किसानले कृषि सामग्री कम्पनी लिमिटेडको प्रादेशिक कार्यालयको भुटनदेवीस्थित गोदामबाट मल नियन्त्रणमा लिएका छन् ।

मेयर सिंहकै अगुवाइमा मल नियन्त्रणमा लिइएको बुझिएको छ । तर, मेयर सिंहका स्वकीय सचिवले भने मेयरले नभइ किसानले नै मल नियन्त्रणमा लिएको बताएका छन् । कार्यालयले जिल्लाका किसानलाई मल नदिइ बाहिर पठाउन लागेको थाहा पाएपछि मल नियन्त्रणमा लिइएको बताएका छन् । पर्सामा धान गोड्ने बेला हुँदा पनि किसानले मल पाएका छैनन् ।